涼與熱 3月30日 星期五
仲有...仲有一日要過呀,等出糧嘅日子真難過呀,想使嘅時候睇見自己個戶口得返幾十蚊,連去櫃員機度攞錢嘅資格都冇,做一個快樂嘅窮人認真艱難......好在返到屋企仲有一餐半餐比我食,真係差唔多連搭車返工嘅錢都使哂,如果唔係聽日就出糧,我諗聽日不如請假休息下好過喇! 可惜唔返工就即係等如唔見錢,冇理由咁請事假一樣要扣糧,所以都係認命把啦~
後記: 朋友抱怨說從來都見不到您，真正原因可能是嫉妒您的新工作。談話如果抓不著重點，只會浪費時間。

焗汗 3月29日 星期四
時間開始變慢哂,三月好似死唔斷氣咁,明明好快就放復活節,但係一日又一日,每日咁計住計住,可能就係咁計計下愈計愈長,一個禮拜將近尾聲,三月三十一日何其慢長呀! 就係因為長假就快來臨,所以老闆都加緊準備,準備旅行前嘅預習呀......今日老闆走去同Ket姐講: 「如果有其他公司嘅人搵我的話,唔好話我放假去旅行,比人知道單工程咁趕都走去放假,人地會唔高興架!」老闆份人真係好奸,上個禮拜已經放逐Leo哥哥飛去拉斯維加斯,又要去度尺又要去傾tender,而自己就去歐洲渡長假,搞到連我都要加把勁工作呀~
後記: 和老闆爭論，他通常會覺得自己的權威被侵犯。應該用他能夠接受的方式表達意見。

風瀟瀟 3月28日 星期三
尋晚發完做老闆嘅美夢之後,一覺瞓醒又要重投工作地獄裡去......去去去,火裡去,水也要去,六合彩又唔到我中,人地就一注獨得三千幾萬,有左呢筆唔肉痛嘅錢,我就可以大展拳腳,實現我嘅人生目標同夢想......醒喇! 唔係實現呀,係現實至真呢,好殘酷嘅現實呀,接受唔到都要接受,仲要係默默咁接受,睇嚟我都好難走出命運嘅枷鎖~
後記: 對方如果發脾氣，就無法明白您的話。不妨先洗耳恭聽，找出他們忿忿不平的原因。

風兮兮 3月27日 星期二
近年來一直都好希望做老闆,自己如果有舊唔肉痛嘅錢的話,勢必出嚟社會大搞小生意,而我心目一早已經定下目標,要視乎舊錢嘅大細而定,想搞咩都已經諗好,其中有一項計劃幾好,其實幾年前有人搞開,仲搞得好成功,不過就要放棄哂自己嘅私人時間,仲要好好好辛苦,加上必需中港兩邊走,而且風險都算幾高,成功要借助運氣先至得,所以只有幾十人搞呢種小生意......等我得閒考返個車牌再諗過啦,比我中埋今期六合彩就完美喇~
後記: 也許，我只要學習在疑惑中生活，只要明白事情未必都有「結局」。

濕陰 3月26日 星期一
來到春天,天氣就變得好濕淋淋,個天成日烏雲密佈好似想落場大大嘅雨,不過又落唔出喎,都唔知個天玩咩......反而美國拉斯維加斯嘅天氣就好好喎,我公司有個同事廿四號就飛去拉斯維加斯做嘢,今日佢send左幾張當地嘅相返嚟,原來個地盤已經差不多完工,頂層嘅大酒店已經裝緊玻璃,而地下嘅賭場都七七八八,不過我地其實已經遲左好多先至交到貨比人,難怪美國佬咁緊張,係都要我地派人過去,唔去唔安樂......而二老闆今次就好醒目咁派個計數佬過去,自己今個禮拜尾就飛去歐洲渡假,一早就plan好哂啦~
後記: 一些很簡單的事，也可以使生活絢爛多姿。只是世人往往忙著達到自己設立的目標，忘了人生總有盡頭。

多雲有雨 3月25日 星期日
非常之悶嘅一個星期日,天氣又差而我嘅心情又跟住一齊差,眼見冇咩好做就走去睇電視,誰不知......頂......原來今日係香港選特首嘅大日子喎,星期日所有嘅節目全部都停播,TVB & ATV獨孤一味淨係播選特首,即係咩電視節目都冇得睇啦,身為唔多理會港事嘅我,對今次選特首都係冇咩興趣,因為明眼人都會知道曾蔭權贏梗,最終以大比數得票而勝出,我仲以為可以睇返正常嘅電視節目,點知......頂......又繼續播埋答問大會喎! 唯一我可以做嘅就只打機,原來我已經有半年多冇玩過部PS2,其實係冇時間玩啫~
後記: 紹興黃酒分元紅(乾型)、加飯(半乾型)、香雪(甜型)、善釀(半甜型)四大系列。

密雲  3月24日 星期六
好難得星期六夜晚都會在香港,今晚唔打算去玩喇,因為三月實在太慢長,要等待五個星期六同星期日,加埋足足九日呀......計一計今個月已經出現財赤,如果唔係二月份有雙糧的話,上個禮拜六已經要留响屋企咬庶,今個禮拜咪當係抖抖日囉,可惜仲要咬埋下個禮拜嘅庶,今日咬庶都咬到呀呀聲,仲要過埋最後呢七日先有糧出,都唔好話唔痛苦~
後記: 運動並非要把性命豁出去。我們需要的是一個終身可的計劃。

天陰 3月23日 星期五
又得到一個開開心心的晚上,尋晚係好朋友肥仔嘅"牛一",舊公司嘅一大班同事們就提議去食餐飯,今次有叫埋我去,不知幾咁開心,因為又有機會一次過見返哂班好好好嘅好朋友,同佢地一齊飲飲食食真係好開心,所有人都認識超過三年以上,感覺係一家人咁,又親切又搞笑又開放,呢種感覺一直都冇忘記,只係唔可以再搵得到這樣嘅真心好友,難免會覺得有點可惜,唯有珍惜吧~
後記: 醫生不能坐視病人死亡。手術不一定成功，但不嘗試，就連成功機會都沒有。

春分 3月21日 星期三
今日終於都比我等到,等到一個難得嘅機會,我當然好好咁把握啦......二老闆今日又走上大陸金鴻廠,又係所謂嘅視察工作進度之類,其實今次應該係輪到我去,不過本人實在工務煩重,未能揪空上大陸廠一遊,雖然表面上好似係錯失一個學習嘅機會,之不會內裡其實係一份苦差,一大堆文件加圖紙要一條友攞上去,之後又要同班廠工友傾工作,一來一回就大大半日,就係咁二老闆一般上大陸廠都唔會再返寫字樓,咁我就借呢次機會出去喇! 當然都係工作而外出,但係終於有機會可以朝頭早唔使返公司,一樂也~
後記: 您一定要有自己的東西。除了個人風格，背後是一種文化，是生活上、本地的東西。

最凍屯門 3月19日 星期一
原來今日係二月初一,"新春月"正式地過去,本來以為三月因為冇咩假期,而會變得勁漫長,睇嚟又好似唔係喎,仲有兩個禮拜就去到四月喇,復活節假期又向我招手......其實今個月只係返過大陸兩次,不過最好玩都係今次,話說18號星期日,五個無聊蒲友冇咩好做,突然心血來潮咁就去左深圳嘅歡樂谷玩玩,機動遊戲一定唔少得啦,仲有一定要陪女朋友去嘅鬼屋,D女仔明知係假都驚餐飽,我女友捉到我鬼死肉緊,搞到我痛到大叫而唔係比鬼嚇,可惜當日我部手機冇哂電,真失敗~
後記: 窮爸爸認為房子是資產；富爸爸則認為是負債，凡是從口袋裡取出金錢都叫負債，能把現金放進袋裡才是資產。